فرشوطى محمد
يكونشي السيسي هو اللى بيرمى الزبالة … وبيكسر اشارة المرور فى الشوارع …وبيغش فى السلع ، وهو اللى عامل فوضى المرور وضيق الشوارع وكثرة السيارات ،وجايب الأمراض والكوارث الاجتماعية للشعب ،ولا يكونشي بيقعد يحقن الفراخ البيضا علشان يسمنها ويبعها لنا زى لحمة الحمير والكلاب … ويرش الخضر والفاكهة بالكيماويات والهرمونات اللى دمرت كبدنا ؟؟
ولا يكونشي هو سبب تخلف التعليم وبيمنع الطلبة من البحث المعرفى ، والحوار ، وتبادل الإراء ،واحترام الأخرين ،وقبول النقد بسعة رحب.ولا يكونشي السبب وراء انتشار الدروس الخصوصية،والتحايل والالتفاف حول القانون؟
ولا يكونشي ياعم فرشوطى هو السبب فى العنف الجسدي والفقر والتفرقة العنصرية والتحرش …والكبت … والجهل ..والفقر ..والمرض ،وحرب أوكرانيا وانتشار فيروس كورونا والقرود؟.
ولا يكونشي بنى له قصر وضع يد وتاجر فى الأراضي اللى ملك الدولة وكسب ملايين من تجارة الأراضي والمخدرات وتاجر بالدين ولهف الملايين وهرب ؟
ولا يكونشي هو اللى بينزل الملعب يجعر مع جمهور الأهلي والزمالك والمصري وغيره ، و يستعمل العصي والصواريخ والشماريخ ؟ وقاعد ماسك التلفون وبشتم الصغير والكبير؟
تصدق ياعم فرشوطي انا اعرف واحد كل ما فرخة ولا جاموسه تموت يقولك السيسي هو السبب . ولما قامت الحرب بين روسيا وأوكرانيا قال هو السبب ، ولما الغلاء حصل في العالم وواحد قتل مراته في بوركينا فاسو قالوا هو السبب !
يكونشي السيسي ده هو اللى علمنا عدم تحمل المسئولية والتواكل ،ودمر مصر ونهب أموالها واستنزف مواردها وجاب الإستعمار واحتل فلسطين !!، ولا يكونشي هو اللى خرب عقولنا بالخرافات والخزعبلات.والثعبان الاقرع وأبو رجل مسلوخة ،وترك الأفاقين والمنافقين يعبثون ويتاجرون بعقول الناس باسم الدين.وزرع بذور التطرف والحقد والكراهية والرشوة والمحسوبية .؟
ولا يكونشي هو سبب ظهور المسترحيين في مصر اللي نهبوا أموال تقدر بالمليارات من آلاف المصريين بطرق احتيالية وياريتهم اتعلمو من الريان لكن الطمع يقل ما جمع.
ولا يكونشي هو سبب المبانى المخالفة والعشوائية والرجال البلطجية و الراقصات والمخدرات والبلاعات المفتوحة في الشوارع . وبرامج الفضائيات المضروبة ، واعلامى السبوبة والمصلحة والصراخ بالصوت الحيانى وكأننا فى «كباريه اللاسع والملسوع» الظاهر احنا فى مولد سيدى الملطوش ومش عارفين ان العيب فينا ولا عارفين احنا رايحين فين ولا عايزين أيه!!
التعليقات متوقفه