حكايات ام الكنى وأم_ترتر…. يكتبها أحمد عبد الحليم « جريدة الجمهورية والعالم

حكايات ام الكنى وأم_ترتر…. يكتبها أحمد عبد الحليم

السبت, أبريل 14th, 2018

ام الكنى هى السيده جليله انور محروس
قصه و تاريخ و حكايه ام الكنى والست أم ترتر

ام الكنى هى السيدة جليله انور محروس من مواليد القاهرة ١٨٤٠ فى عهد محمد على باشا و ورثت عن ابيها تجاره الحشيش و الافيون و كان وقتها مقنن و مصرح به فى الاسواق العامة

ثم توالت الاحداث حتى عصر الخديوى اسماعيل حيث اصدرت الدولة وقتها قانون يجرم تجاره الحشيش و من وقتها واجه الحشاشون ظروف صعبه

وكان الحشاشون يشعرون بالاستياء من القانون الجديد الذى سلب منهم حريه تعاطى الحشيش

حتى قامت السيدة جليله بشوره انهم يمكنهم التمادي بالتعاطي خلف اعين الدوله حيث قالت جملتها الشهيرة

اللى عايز يشرب يشرب بس “يتكن” فى بدروم القهوة التى كانت تمتلكها

و شيع الخبر بين الحشاشين انك ممكن “تتكن” عند السيدة جليله و تفعل ما يحلو لك حتى ذاعت شهرتها بانها ام الكن فى مصر

وبقى لما حد يسال احد الحشاشين عن طريقه تفاديه القانون كانت الاجابه عند ام الكنى

و من هنا استخدم الناس اسم ام الكنى كنايه عن السطل و عدم الاهتمام بجديه الحديث

والله الواحد بيتعب علشان يغوص في بدروم التاريخ.

أما الست أم_ترتر فهى فوسه الشهيره ب “أم ترتر” كانت ساكنه فى حوارى كرموز ومعروف عنها أنها لامؤاخذه ست لسانها طويل ومفتريه وفى فرش الملاية مالهاش مثيل وماشيه على مبدأ فى الحارة: “الشرشوحه ست جيرانها” ..

أم ترتر مخلفتش ترتر عندها اسماعيل وابراهيم ونبويه ترتر اسم شهره لأنها كانت عايقه بتلبس جلاليب ومنديل بترتر عشان كدا سموها أم ترتر وجوزها المعلم علوان أبو اسماعيل “عربجى حنطور “..

أم ترتر كانت ست بيت شاطرة ساكنه فى بيت دور واحد منه بيت وعربخانه لحصان وعربيه المعلم علوان والبيوت اللى حواليها دورين وثلاته وعامله فوق السطح مزرعة فراخ وبط وكلهم “برابر ” مافيش ولا ديك ولا دكر بط .. و سايباهم سارحين ع السطح يلاغو فى ديوك ودكورة بط الجيران وزى ما قالوا “ومن الحب ما قتل حتى فى الفراخ والبط” ديوك الجيران كانت تنط على سطح أم ترتر عشان تكسر الفراخ الديك اللى ينط أو دكر البط على سطح أم ترتر مفقود ياولدى وعلى طول يبقى اجدع عشوة للمعلم علوان!! وكانت خبرة فى اخفاء اثر الديك من ريش وخلافه واللى كان يضيع لها ديك وتسأل الجيران يردوا عليها بصوت واطى “عند أم ترتر ربنا يعوض عليكى” عشان أم ترتر لو سمعت تخلى فرده الشبشب اعلى منهم مش بقولكوا كانت مفتريه كانت ريا وسكينه الفراخ ..

وطلع المثل الشعبى “عند أم ترتر” يدل على أستحاله أنك تلاقى اللى بتدور عليه رغم أنك عارف ومتأكد مين اللى خده …!!!!

أضف تعليق

عدد التعليقات